ගෝල්ෆේස් නිරායුධ අරගලකරුවන්ට සහ ජනමාධ්‍යවේදීන්ට සන්නද්ධ හමුදා යොදවා පහරදීම දැඩි පිළිකුලෙන් යුතුව හෙළාදකිමු.
2022.07.22
කොළඹ.
මාධ්‍ය නිවේදනය
ගෝල්ෆේස් නිරායුධ අරගලකරුවන්ට සහ ජනමාධ්‍යවේදීන්ට සන්නද්ධ හමුදා යොදවා පහරදීම දැඩි පිළිකුලෙන් යුතුව හෙළාදකිමු.
ශ්‍රී ලංකා ප්‍රජාතාන්ත්‍රික සමාජවාදී ජනරජයේ අටවන ජනාධිපති රනිල් වික්‍රමසිංහ එම ධූරයේ දිවුරුම් දී පැය 48ක් ගතවන්නටත් මත්තෙන් ගෝල්ෆේස් නිරායුධ අරගලකරුවන්ට සන්නද්ධ හමුදා යොදවා පහර දී ඇත. එම පහරදිම් වාර්තාකරණය සදහා ගෝල්ෆේස් අරගල භූමියට යමින් සිටි සහ අරගල භුමිය තුළ සිට දෙස් විදෙස් මාධ්‍යය සදහා වාර්තාකරණයේ යෙදෙමින් සිටි ජනමාධ්‍යවේදීන් ට දරුණු ලෙස පහරදීම පිළිබඳව අප සංගමයේ දැඩි විරෝධය පළකරමු.
දැඩි ආර්ථික අර්බුදයක ගැලීසිටින තත්ත්වයක් තුළ ශ්‍රී ලංකාව විදේශීය සහාය පතමින් සිටින මොහොතක, ආණ්ඩුවේ මෙවැනි ප්‍රජාතන්ත්‍ර විරෝධී ක්‍රියා කලාපයන් මගින් රට තවදුරටත් ගොඩ ගත නොහැකි ආගාධයකට ඇද දමමින් තිබේ. විශේෂයෙන් නිදහස් මාධ්‍යය වාර්තාකරණයකට කුමණ තත්ත්වයක් යටතේ වුවද ඉඩ කඩ තිබිය යුතු බව අප සංගමයේ අදහසය. ගෝල්ෆේස් අරගල භුමිය තුළ අද (22) අළුයම සිට එවැනි තත්ත්වයක් නොතිබූ බව අප සංගමයේ නිරීක්ෂණය වේ. දෙස් විදෙස් මාධ්‍යය සදහා තොරතුරු සපයන මාධ්‍යවේදීන් තම අනන්‍යතාවය තහවුරු කරමින් සිටියදී පවා ආරක්ෂක අංශ ඔවුනට පහරදීමෙන් සහ පැහැරගෙන යාම් හරහා පෙන්නුම් කරනුයේ රනිල් වික්‍රමසිංහ පාලනයද ජනමාධ්‍යය නිදහස අමු අමුවේම තලාපෙලා දමන බවය.
ප්‍රජාතන්ත්‍රවාදී රටක තොරතුරු දැන ගැනීමේ අයිතිය පුරවැසියනට තිබිය යුතුය. එම අයිතිය වඩාත් සුරක්ෂිත වනුයේ ජනමාධ්‍යවේදීන්ට නිදහසේ තම වාර්තාකරණය කළ හැකි පරිසරයක් පවතිනතාක් පමණි. එම පරිසරය රනිල් වික්‍රමසිංහ ජනපතිවරයා ලෙස පත්ව පැය 48 ක් ගතවන්නටත් මත්තෙන් බිඳ හෙලීම තුළ , මෙරට ජනමාධ්‍යවේදීන්ට සිහිගැන්වනුයේ රාජපක්ෂ පාලන සමයන්හිදී සිදුකළ මාධ්‍යය මර්ධනය , මාධ්‍යවේදීන් ඝාතනය, පැරගෙනයාම, වද හිංසා පැමිණවීම, මාධ්‍යය ආයතන ගිණිතැබීම ඇතුළු මාධ්‍ය කෙරෙහි එල්ල කළ භීෂණයයි.
ආරක්ෂක අංශ සහ පොලීසියේ පහරදීම් හේතුවෙන් මේ වනවිටත් කසුන් කුමාරගේ (වෙබ් මාධ්‍යවේදී – ශ්‍රී ලංකා පුවත්පත් ආයතනය) සහ චතුරංග ප්‍රදීප් කුමාර (එක්ස්පෝෂර් වෙබ් අඩවිය) යන ජනමාධ්‍යවේදීන් දෙදෙනා ජාතික රෝහලට ඇතුලත් කර ඇත. මීට අමතරව රසික ගුණවර්ධන සහ ෂබීර් මොහොමඩ් (වෙබ් මාධ්‍යවේදීන් – එක්ස්පෝෂර් වෙබ්) ද පහරකෑමට ලක්වී ඇති අතර, බීබීසී මාධ්‍යවේදී ජරීම් සැමුවෙල් ආරක්ෂක අංශයන්හි තර්ජනයන්ට ලක්වී ඇත.
ආණ්ඩුවේ මෙම මාධ්‍යය මර්ධනය ට එරෙහිව ජාතික සහ ජාත්‍යන්තරව අප සංගමයට කළ හැකි සියළු මැදිහත්වීම් සිදුකරන බවත් ජනතාවගේ තොරතුරු දැන ගැනීමේ අයිතියට අත නොතබන ලෙසත් දැඩිව පවසන්නෙමු.
දුමින්ද සම්පත් ෆ්‍රෑන්ක් ද සොයිසා
සභාපති ලේකම්
