සිරස මාධ්‍යවේදීන්ට සිදුකළ අමානුෂික පහරදීම හෙළාදකිමු !
09.07.2022
කොළඹ
මාධ්‍ය නිවේදනය
සිරස මාධ්‍යවේදීන්ට සිදුකළ අමානුෂික පහරදීම හෙළාදකිමු !
2022.07.09 දින (අද) අග්‍රාමාත්‍යවරයාගේ පෞද්ගලික නිවස අසල වාර්තාකරණයේ යෙදෙමින් සිටි සිරස මාධ්‍ය ආයතනයේ මාධ්‍යවේදීන්හට ශ්‍රී ලංකා පොලිසිය සහ පොලිස් විශේෂ කාර්‍ය බලකාය විසින් සිදුකළ අමානුෂික පහරදීම ශ්‍රී ලංකා වෘත්තීය ජනමාධ්‍යවේදීන්ගේ සංගමය දැඩි පිළිකුලෙන් යුතුව හෙළා දකියි.
මෙසේ පහරකෑමට ලක්වූ මාධ්‍යවේදිනී සරසි පීරිස් ඇතුළු ජනිත මෙන්ඩිස්, වරුණ සම්පත්, ජේ. සින්තුජන්, කාලි මුත්තුචන්ද්‍රන් සහ ජානුක වීරකෝන් යන මාධ්‍යවේදීන් මේ වනවිට රෝහල්ගත කර ඇති බවට තහවුරු වී ඇති අතර, මෙවැනි පහරදීම් ශ්‍රී ලංකා ආණ්ඩුක්‍රම ව්‍යවස්ථාවෙන්ද තහවුරු කර ඇති මහජනතාවට තොරතුරු දැන ගැනීමට ඇති අයිතියටද එල්ලකරන බරපතල පහරක් බව අපගේ විශ්වාසයයි.
මින් පෙර බොහෝ අවස්ථාවලදීද වාර්තාකරණයේ යෙදී සිටින මාධ්‍යවේදීන්ට පොලිසිය සහ ආරක්ෂක අංශ වෙතින් සිදුකෙරෙන විවිධ හිංසන සහ පහරදීම් පිළිබඳව ජනමාධ්‍යය විෂය භාර අමාත්‍යවරයා සහ පොලිස්පතිවරයා දැනුවත් කරමින් ඒවාට වගකිවයුත්තන් නීතිය ඉදිරියට පමුණුවා නිසි දඬුවම් ලබාදෙමින් එවැනි දේ නැවත සිදුවීම වැලැක්වීමට අවශ්‍ය පියවර ගැනීම සඳහා මැදිහත්වෙන ලෙස ඉල්ලා සිටියද, ඒ පිළිබඳව මෙතෙක් ක්‍රියාත්මක නොවීම මත දිගින් දිගටම මාධ්‍යවේදීන් හිංසනයට ලක්වෙන බව අප සංගමය තරයේ විශ්වාස කරන අතර, මෙම අවස්ථාවේදීවත් ඉහත මාධ්‍යවේදීන්හට පහරදුන් පුද්ගලයින් වහාම අත් අඩංගුවට ගෙන ඔවුනට එරෙහිව තරාතිරම නොබලා නීතිය ක්‍රියාත්මක කරන මෙන් පොලිස්පතිවරයා ගෙන් ශ්‍රී ලංකා වෘත්තීය ජනමාධ්‍යවේදීන්ගේ සංගමය ඉල්ලා සිටියි.
දුමින්ද සම්පත් ෆ්‍රෑන්ක් ද සොයිසා
සභාපති ලේකම්
