QR කේතය යටතේ ජනමාධ්‍යවේදීන්ට ඉන්ධන ලබා ගැනීම සම්බන්ධවයි.
12.08.2022
කාංචන විජේසේකර මහතා,
විදුලිබල සහ බලශක්ති අමාත්‍ය,
විදුලිබල සහ බලශක්ති අමාත්‍යාංශය,
නො. 72, ආනන්ද කුමාරස්වාමි මාවත,
කොළඹ 07.
හිතවත් අමාත්‍යතුමනි,
QR කේතය යටතේ ජනමාධ්‍යවේදීන්ට ඉන්ධන ලබා ගැනීම සම්බන්ධවයි.
පසුගිය කාලයේ පැවැති ඉන්ධන අර්බුධය හමුවේ පිරවුම්හල් අසල මහජනතාව විශාල ලෙස ඒකරාශී වීම සහ ඒ හේතුවෙන් ඇතිවූ ගැටුම්කාරී වාතාවරණයන් සමථයකට පත්කිරීම උදෙසා ඔබ අමාත්‍යාංශය මගින් QR කේත ක්‍රමය හඳුන්වාදීම පිළිබඳව පළමුකොට ශ්‍රී ලංකා වෘත්තීය ජනමාධ්‍යවේදීන්ගේ සංගමයේ ස්තුතිය පළකරන්නෙමු.
මෙසේ QR කේතයට අනුව ඉන්ධන ලබාදීම ඉතා ප්‍රායෝගික මෙන්ම සාර්ථක ක්‍රමයක් වුවත්, තම රාජකාරි කටයුතු සඳහා යතුරුපැදි සහ ත්‍රී රෝද රථ භාවිතාකරන බහුතරයක් ජනමාධ්‍යවේදීන්ට සතියකට ලබාදෙන ඉන්ධන කෝටාව ප්‍රමාණවත් නොවන බව පෙන්වාදීමට කැමැත්තෙමු. විශේෂයෙන් දිවා රෑ නොබලා වාර්තාකරණයේ යෙදෙන ප්‍රාදේශීය මාධ්‍යවේදීන්ගේ ආවරණ කලාපය ඉතා විශාලවන බැවින් ඔවුන්හට සතියකට ලබාදෙන ඉන්ධන කෝටාව කිසිසේත්ම ප්‍රමාණවත් නොවන බව කණගාටුවෙන් දන්වා සිටිමු. ප්‍රමාණවත් පරිදි ඉන්ධන නොලැබීම හේතුවෙන් තම වාර්තාකරණ කටයුතු පූර්ණ ලෙස ඉටුකිරීමට බොහෝ මාධ්‍යවේදීන් අපොහොසත් වී ඇත.
මෙම කරුණු සලකා බලා, මාධ්‍යවේදීන්හට සතියකට නිකුත් කරන ඉන්ධන කෝටාව ප්‍රමාණවත් පරිදි වැඩි කිරීම පිළිබඳව ඔබේ අවධානය යොමුකරන මෙන් ඉල්ලා සිටිමු. මෙසේ වැඩි ඉන්ධන ප්‍රමාණයක් මාධ්‍යවේදීන් හට ලබාදීමට විෂය භාර අමාත්‍යවරයා ලෙස ඔබ ගන්නා ක්‍රියා මාර්ගය ජනතාවගේ තොරතුරු දැනගැනීමේ අයිතියට ද කෙරෙන සාධාරණයක් බව අප සංගමයේ අදහසයි.
ස්තුතියි,
දුමින්ද සම්පත් ෆ්‍රෑන්ක් ද සොයිසා
සභාපති ලේකම්
පිටපත : ප්‍රවෘත්ති සහ ජනමාධ්‍ය අමාත්‍යතුමා
